இந்தத் தியானமுறையைப் பற்றி :🔗

உங்களது சூட்சும உடலை உணர்ந்து கொள்வதற்கான வழிதான் இந்தத் தியானம்.

உங்களுக்கு Palming பழக்கப்பட்டிருந்தால், இந்தத் தியானத்தை எளிதாகச் செய்துவிட முடியும்.

நம் அனைவருக்குள்ளும் ஏழு சரீரங்கள் உள்ளன. ஒவ்வொரு சரீரத்தையும் தெய்விகத்திற்குள் பிரவேசிக்கும் வாயிலாகப் பயன்படுத்தலாம்.

ஸ்தூல உடலை (Physical body) அடுத்திருக்கும் சூட்சும உடலை (Etheric body) அடையாளம் கண்டுகொள்வது எளிது.

காரணம் அது ஸ்தூல உடலை ஒட்டி, அதற்கு வெளியே அமைந்திருக்கிறது. குட்சும உடல், நமது ஸ்தூல உடலோடு ஒட்டி நின்று, விரிந்து, நமது ஸ்தூல உடலுக்கு ஒரு கவசம் போல் அமைந்து விடுகிறது.

செயல்முறை விளக்கம் :

Palming பயிற்சி செய்தால் நீங்கள் எடையற்றவராய், பறக்கத் தயாராக இருப்பது போல் உணர்வீர்கள். மற்ற தியானங்கள் செய்யும்போது, சில சமயங்களில் இதை நீங்கள் உணரலாம்.

உங்களது வடிவம் பற்றிய எண்ணம் இருக்க வேண்டும்.

கண்களை மூடியபடி, உங்கள் உடலின் ஒவ்வொரு பாகத்தையும், ஒன்றன்பின் ஒன்றாக நினைவில் நிறுத்தவும்.

உங்கள் விரல்களின் வடிவம், உங்கள் கை, கால், இடை, தலை என எல்லாவற்றையும் வரிசையாக உணரவும். உங்கள் உடலின் மொத்த வெடிவத்தின்மீதும் கவனம் இருக்கட்டும்.

உங்கள் வடிவத்தை நினைவு கொள்ள முயற்சி செய்யும்போது, உங்களது உடலைச் சுற்றி, ஒரு நீல ஒளிவட்டம் இருப்பதைப் பார்க்கலாம். உங்கள் உடலைச் சுற்றியிருக்கும் இந்த ஒளிவட்டம் விரிந்து பரவி கொண்டே இருக்கும்.

ஆரம்பத்தில், அந்த ஒளிவட்டத்தை நன்றாகப் பார்க்க முடியும்போது, கண்களைத் திறந்து பார்க்க முயலலாம்.

நல்ல இருட்டு அறை ஒன்றைத் தேர்ந்தெடுத்துக் கொள்ளுங்கள்.

இதை இரவில் செய்வதே நல்லது.

கண்கள் மூடிய நிலையில் அந்த ஒளிப் போர்வையை நீங்கள் காண முடியும்போது, கண்களைத் திறக்கவும்.

உங்கள் உடலைச் சுற்றிலும் பரவியிருக்கும் அந்த நீல ஒளியை நீங்கள் காணலாம்! முதன்முதலாக நீங்கள் உங்கள் நுண் உடலைப் பார்க்க முடிகிறது.

பல சமயங்களில் இந்த அனுபவம் நமக்கு வாய்க்கிறது என்றாலும், அதைப் பற்றிய உணர்வு நமக்கு இருப்பதில்லை.

நீங்கள் ஒரு அறைக்குள் பிரவேசிக்கும் போது, அந்த அறை முழுக்க அந்நியர்கள் நிறைந்திருந்தாலும்சரி அல்லது நண்பர்களே நிறைந்திருந்தாலும்சரி, அந்த வித்தியாசத்தை நீங்கள் உணர முடியும், உங்கள் கண்களைக் கட்டியிருந்தாலும்கூட! உங்களை வெறுக்கும் ஒருவர் உங்கள் அருகில் வரும்போது, அவரது சூட்சும உடல் சுருங்கிப் போகும்.

உங்களுக்குச் சினமோ, ஆவலோ, வருத்தமோ ஏற்படும்போது, உங்கள் உடல் சுருங்குவதுபோல் உணர்வீர்கள்.

அது உங்கள் சூட்சும சரீரம் சுருங்குவதுதான்.

நீங்கள் அதிகமாக சந்திக்கும்போது, இருவரும், ஒருவரை நோக்கி ஒருவர் ஈர்க்கப்படுவதுபோல உணர்வீர்கள். உங்கள் சூட்சும உடலின் விரிவுதான் அது.

நாம் உணராமலேயே, நமது சூட்சும உடல்களின் சமிக்கைகளைப் பயன்படுத்தியே ஒரு சூழ்நிலையை நாம் மதிப்பிடுவதும், மற்றவர்களோடு தொடர்பு கொள்ளுதலுமான சூட்சுமத்தை நாம் உருவாக்கிக் கொள்கிறோம்.

அந்த எதையுமே செய்ய வேண்டாம். சும்மா அமர்ந்து பார்த்துக் கொண்டிருங்கள். அந்த ஒளி வட்டம் மெல்ல விரிவடைந்து பரவும்.

அது மேலும் மேலும் பெரியதாகிவிடும்.

நீங்கள் ஒன்றுமே செய்யாமல் இருந்தாலும்கூட உங்களது சக்தி வெளியே சென்று விடுவதில்லை. அது உங்களது சூட்சும உடலில் ஒன்று திரள்கிறது.

உங்களைச் சுற்றியுள்ள உங்களது ஒளிவட்டம் வலிமை பெறப்பெற, நீங்கள் ஆழ்ந்த அமைதி உணர்வைப் பெறுவீர்கள். ஒரு நிசப்தத்தை அனுபவிப்பீர்கள். இந்தத் தியானத்தை அடிக்கடி பயிற்சி செய்து வந்தால், அவ்வகை அமைதி, நிரந்தர அனுபவமாகிவிடும்.