தியான அனுபவத்தைப் பெற்று விட்டதை எவ்வாறு அறிவது?🔗

உங்களுக்குள் ஏற்படும் இந்த மாற்றங்களைக் கண்டுதான்.

வெறும் சுதந்திரம் :

நீங்கள் அனுபவிக்கப்போகும் மாற்றம் ஒருவகையான சுதந்திர உணர்வு.

ஏன் சுதந்திரம் ?

அதற்கும் சுதந்திரத்திற்கும் என்ன தொடர்பு ?

நாம் வாழ்நாள் முழுவதும் தேடிக் கொண்டிருப்பது சுதந்திரத்தைத்தான்.

நாம் உணர்கிறோமோ இல்லையோ, நம்மில் ஒவ்வொருவரும் தேடிக்கொண்டிருப்பது சுதந்திரத்தைத்தான். தியானம் என்பதுகூட தீவிரமானதொரு சுதந்திரத் தேடல்தான். தியானம் சுதந்திரம் தரும் என்று கேள்விப்பட்டிருக்கிறோம். அதனால்தான் விடுதலைப் பெற நாம் தியானத்தை நாடுகிறோம்.

'சுதந்திரம்' என்ற சொல்லை நாம் தவறாகப் புரிந்து கொண்டிருக்கிறோம். நம் சாதாரண வாழ்வில் நாம் தேடுவது, 'இன்னதற்காகச் சுதந்திரம்' அல்லது 'இன்னதிலிருந்து சுதந்திரம். '

நாம் விரும்புவதையெல்லாம் செய்வதற்கான சுதந்திரம், நமக்குச் சரியென்று படுகிற விதத்திலெல்லாம் வாழ்வதற்கான சுதந்திரம் -இதுதான் 'இன்னதற்கான சுதந்திரம்'.

நாம் அஞ்சும், வெறுக்கும் எல்லாவற்றிலிருந்தும் -அதாவது நோய், கவலை, சினம், மனஅழுத்தம், உணர்வு, மனப்பான்மை, வேதனை முதலியவற்றிலிருந்து விடுதலை பெறும் சுதந்திரம்- இதுதான் 'இன்னதிலிருந்து சுதந்திரம்'.

நமது எல்லாச் செயல்களும், இவை இரண்டில் ஒன்றில்தான் அடங்கி இருக்கிறது.

நல்லதற்கான பேராசை. தீயதைக் கண்டு பயம்.

நமது வாழ்வு முழுவதையும், இந்தப் பேராசை, அச்சம் என்ற இரண்டு சூத்திரக் கயிறுகளே ஆட்டிப் படைக்கின்றன. இந்த இரு சூத்திரக் கயிறுகள் நம் வாழ்வின் மீது ஆதிக்கம் செலுத்தும் வரை, நாம் தேடித் தவிக்கும் சுதந்திரம் எங்கே கிடைக்கும் ?

சில வாரங்களுக்கு முன்னால், வழக்கமாக வரும் சீடர் ஒருவர், என்னிடம் பேசிக் கொண்டிருந்தார். அவர் ஒரு ஓவியக் கலைஞர். அவர், தியானத்தைத் தாம் வெறுப்பதற்கான காரணத்தைச் சொன்னார்.

''சுவாமி! நான் இந்த விதிமுறைகள், சட்டங்களை எல்லாம் வெறுக்கிறேன். நான் விரும்பும் வகையில் சுதந்திரமாக என் வாழ்வை நடத்த விரும்புகிறேன்.

பாருங்கள், நான் 6 மணிக்கு எழுகிறேன்.

முதலில் நீந்தப் போய்விடுகிறேன், விரும்பும் போதெல்லாம்…." இப்படி ஒரு நாள் முழுவதையும் எனக்கு அவர் விளக்கினார்.

நான் அவரைக் கேட்டேன், "யாராவது உங்களை 6 மணிக்கே எழுப்பி விட்டால் என்ன செய்வீர்கள் ? உங்களது படுக்கைக்குக் காப்பி வரவில்லையென்றால் என்ன செய்வீர்கள் ? என்றேன்.

''ஒ, எனக்குக் கடும் கோபம் வந்துவிடும்,'' என்றார் சிரித்தபடியே.

''மழை பெய்து, உங்களது நீச்சலைக் கெடுத்து விட்டால்... ?''

"ஆமாம், அது படுமோசம்தான். நான் ஒரு நாள் நீந்தாமற்போனால், அந்த நாள் முழுதும் என்னவோ போலிருக்கும், '' என்றார்.

பிறகு நான் கேட்டேன் .... "உங்கள் சுதந்திரம் பலவற்றைப் பொறுத்திருக்கிறதே. நீங்கள் எவ்வாறு உண்மையான சுதந்திரத்துடன் இருக்க முடியும் ?'' என்று கேட்டேன்.

சுதந்திரம் என்பது எந்த நிலையிலும், எல்லா சூழ்நிலைகளிலும் சுதந்திரமாக இருப்பது. இதைத்தான் வெறும் சுதந்திரம் என்றழைக்கிறோம்.

இதற்காகவோ, இதிலிருந்தோ அல்ல. நிகழ்பொழுதில் பரிபூரண சுதந்திரத்தோடு வாழ்தல்.

பேராசையோ, அச்சமோ, எதிர்காலத்திற்கான எதிர்பார்ப்போ, இறந்தகாலம் பற்றிய வருத்தமோ எதுவுமே இல்லாமல், எதற்கும் கட்டுப்படாமல், இருந்தால் மட்டுமே அந்தச் சுதந்திரத்தை அனுபவிக்க முடியும்.

இதுதான் உண்மையான சுதந்திரம். இந்த வகைச் சுதந்திரத்தைத்தான் நீங்கள் தியானத்தின் போது அனுபவிப்பீர்கள்.

காரண காரியமில்லாத அன்பு:

தியானத்தில் தொடங்கும் அபூர்வமான ஒன்று, அன்பு!

மக்கள் தரிசனங்களையும், அவர்களுடைய தெய்வங்களிடமிருந்தும், மகான்களிடமிருந்தும் காணத் தயாராக இருக்கிறார்கள். ஆனால் அவர்கள் மட்டும் அன்பு என்னும் அற்புதத்திற்கு தயாராக இல்லை !

தியானத்தில் பிரவேசிக்கும்போது, உங்களிடமிருந்து எவ்வளவு அன்பு வெள்ளம் பெருக்கெடுக்கிறது என்பதைக் காண நீங்கள் ஆச்சரியப்படுவீர்கள்.

தியானத்தின் மூலமாக, விழிப்பை நீங்கள் அனுபவப்பூர்வமாக உணர்வீர்கள். இதுவரை நீங்கள் எட்டியிராத எல்லைக்கு எட்டியதை உணர்வீர்கள்.

அந்த மகிழ்ச்சியைப் பார்க்கிறவர்களிடம் எல்லாம் பகிர்ந்து கொள்ள நீங்கள் விரும்புவீர்கள்! இந்த மகிழ்ச்சி நிறைந்துதான், அன்பாக உங்களிடமிருந்து பாய்கிறது

சுதந்திரத்தைப்போலவே, இந்த அன்பும், நீங்கள் முன்பே அனுபவித்திருக்கும் அன்பைவிட வேறானது.

நாம் நமது வாழ்வு முழுவதிலும், நம்முடைய அற்பமான சுயநல அன்பைக் கொடுக்கவும், வாங்கவும் செய்கிறோம்.

நம் வாழ்வு ரசிக்கப்பட்டதும் ஏதோ ஒரு காரணத்திற்காகவே.

நினைவுடனோ, அல்லது நினைவின்றியோ, நீங்கள் ஒரு காரணத்திற்காகவே அன்பு செலுத்துகிறீர்கள்.

மிக நெருங்கிய உறவிற்கு இடையிலும்கூட கணவன், மனைவி, பெற்றோர், குழந்தைகள் - என எல்லாருடைய உறவிலும்கூட, அன்பிற்கான காரணங்கள் மறைந்து கிடக்கின்றன.

நமது அன்பு முழுவதுமே களங்கப்பட்டு, பொறாமையாலும், உடைமை மனோபாவத்தாலும் அழிந்து போகிறது.

காரணமே இல்லாமல் அன்பு செலுத்தக் கூடியதைத் தியானத்தின் மூலமாக, நீங்கள் முதன்முதலாகப் புரிந்து கொள்வீர்கள்.

முதல் முதலாக, நீங்கள் எதையும் பெறுவதற்கு உத்தரவு போட மாட்டீர்கள். உங்களிடம் ஏராளமான அன்பு இருப்பதால்தான் அன்பைப் பொழிகிறீர்கள்! மழை மேகம் பூமியின் மீது பொழிவதுபோல, நீங்கள் அன்பைப் பொழிவீர்கள். அல்லது, ஒரு நறுமண மலர் தன் மணத்தை எங்கும் பரப்புவதுபோல பரப்புவீர்கள்...

நீங்கள் அன்பு செலுத்தியே தீர்வீர்கள்!

உங்களால் அன்பு செலுத்தாமல் சும்மா இருக்க முடியாது !