ஆனந்த நடனம்🔗

இந்தத் தியானமுறையைப் பற்றி :

தியானத்தின் ஒரு சக்திமிக்க வடிவம் நடனம்!

முறையான நடனம், சுதந்திரமான நடனம், இரண்டுமே சக்தி மிக்க தியான முறைகள்தான். சுதந்திரமான நடனம் கூட, உணர்வைத் தூய்மை செய்வதற்கான ஒரு தியான நுட்பம்தான்.

நடனத்தின்போது நீங்கள் உங்களை இழந்துவிட வேண்டும் என்பதுதான் நோக்கம்.

முறையாக நடனம் கற்றவர் இந்த நிலையை அடைய முடியும் ஏனென்றால் அவர் நடனத்திற்குரிய இலக்கண விதிகளை ஞாபகத்தில் வைத்துக் கொள்ள வேண்டிய அவசியமில்லை. நடன விதிகளைப் பற்றிய நினைவுகூட ஒரு தடைதான். அந்தகைய ஒரு இடையூறு இல்லாமல் அவரால் இயல்பாக நடனமாட முடியும். ஒரு முறையான நடனமுறையாகவே அது இருந்தாலும் கூட அவரால் இயல்பாக நடனமாட முடியும். ஆனால் நீங்கள் நடன முறையைப் பற்றித் தெரியாதவராக இருந்தால் சுதந்திர நடனமே ஆடி மகிழுங்கள், இல்லாவிட்டால் விதிகளே உங்களைக் கட்டுப்படுத்தத் துவங்கிவிடும்.

செயல்முறை விளக்கம் :

சுதந்திர நடனம் என்பது, கால் வைப்பு முறைகளில் எந்த விதியும் இல்லாதது; நாட்டிய விதிகள் இல்லாதது.

உங்கள் உடல் எப்படியெல்லாம் விரும்புகிறதோ அப்படியெல்லாம் ஆடுங்கள்.

நடனம் விளையாட்டுப்போல ஆடி மகிழுங்கள்.

நடனத்தின் அளவற்ற சக்தியின் பாகமாக மாறுங்கள்.

சுதந்திர நடனத்தில் இரண்டு கட்டங்கள் உள்ளன.

ஒன்று நடனம், மற்றது ஓய்வு.

நடனம் (21 நிமிடங்கள்) :

கண்களை மூடிக் கொண்டு நடனமாடுங்கள். காலடி வைப்புகள் பற்றிக் கவலைப்படாமல் ஆடுங்கள். உங்கள் உடல் இறுக்கமில்லாமல் இளகியபடி இருக்கட்டும்.

உங்களது உணர்வற்ற மனம் நடனத்தை நடத்திச் செல்லட்டும்! நடனத்தில் நீங்கள் எப்படி தோன்றுகிறீர்கள். உங்கள் உடைகள் எப்படி உள்ளன என்பதைப் பற்றியெல்லாம் கவலையே படாதீர்கள். உங்களை யாரும் பார்க்கப் போவதில்லை. அது பார்வையாளர்களுக்கான நிகழ்ச்சி அன்று.

நீங்கள் தொடர்ந்து நடனம் ஆடிக்கொண்டே இருக்கையில், சோர்வு என்பதே தோன்றாது. மேலும் மேலும் உங்களுக்குள்ளிருந்து சக்திப் பிரவகித்து உங்களை ஆடிக் கொண்டே இருக்கச் செய்யும்.

எவ்வளவு அதிகம் ஆடுகிறீர்களோ, அவ்வளவு அதிகம் சக்தி பெற்றவர்களாக ஆவீர்கள்!

மற்ற தியானங்களைப்போல் அல்லாமல் நடனத்தைப் பற்றிய கவனமோ, ஆடும் உங்களைப் பற்றிய கவனமோ இருக்கக்கூடாது. நடனத்திற்குள் ஆழமாக ஆழ்ந்து விடுங்கள். முடிந்தவரை, வேகமாக ஆடுங்கள்; சுதந்திரமாக ஆடுங்கள்.

உங்களை முழுமையாக மறந்து விடுங்கள். நாட்டிய மாகவே மாறி விடுங்கள்.

அமைதி ( 1 0 நிமிடங்கள்) :

21 நிமிடங்கள் முடிந்த பிறகு, உரத்த மணியோசை கேட்கும். நீங்கள் அப்போது, எங்கே, எப்படி இருக்கிறீர்களோ, அப்படியே தரையில் சாய்ந்து விடுங்கள். விழுந்து விடுங்கள்! படுத்துக்கொள்ளுங்கள். அசையாமல் மௌனமாய் இருங்கள்.

திடீரென சட்டென அசையாத் தன்மைக்குச் சென்றுவிடும்போது, ஒரு கண நேர இருளை நீங்கள் அனுபவிக்க நேரும். உங்கள் மனத்தில் எந்த எண்ணங்களும் இராது; வெறும் அமைதி மட்டுமே நிலவும்.

சில வினாடிகளில், எண்ணங்கள் திரும்பி வர ஆரம்பிக்கும். அமைதியாக அந்த வண்ணங்களைச் கவனியுங்கள்.

அவற்றோடு போராடாதீர்கள்.

அவற்றிற்குள் மூழ்கி விடவும் வேண்டாம்.

விழிப்புணர்வுடன் இருந்தால் போதும். நீங்காத அமைதி உங்களுக்குள் ஏற்படுவதை நீங்கள் உணரலாம்.

எண்ணங்கள் தோன்றிய பின்பும்கூட, மாபெரும் அமைதி உங்களுக்குள் நிலைபெறும். அந்த அமைதியை, அந்த மௌனத்தை, உங்களது நாள் முழுவதற்குமாகக் கொண்டு செல்லுங்கள்.

உங்கள் உறக்கத்திற்கும் கூடக் கொண்டு செல்லுங்கள்.

அதன் பிறகு, நீங்கள் புத்தம், புதியதாய் உற்சாகத்துடன் விழித்தெழுவீர்கள்.