அதிசயம், ஆச்சரியம், சாதனை🔗

இன்னும் மலராத மொட்டு மனிதனின் தனித்துவம் (Individuality). மலர்ந்தும் ...

வாசமில்லா மலராயிருப்பவை ! மனிதனின் ஆளுமை எனப்படும் குணாதிசயங்கள் (Personality).

மனிதன் கடவுளாக மலர்வது மட்டுமே இந்த உலகின்

பெரிய அதிசயம், ஆச்சரியம், சாதனை.

மலர்ந்த மலரின் (மனிதனின்) ... நறுமணம் - மனிதநேயம் நிறம் - அன்பு அழகு - ஆனந்தம்

உள்ளுலக விசா

'சில தடவைகள் தியானத்தில் ஈடுபட்டேன், பெரிய மாற்றம் ஒன்றும் நிகழவில்லை' என்று சிலர் சொல்ல கேட்டிருப்பீர்கள். சில தடவைகள் தியானத்தில் ஈடுபட்ட உடன் பலன் கிடைக்க வேண்டும் என்று எதிர்பார்ப்பது சரியல்ல. முதலில் மனதின் சப்தம் கேட்கப்பட வேண்டும். இரண்டாவதாக மனதின் இயக்கம் புலப்பட வேண்டும். மூன்றாவதாக மனதைப் புரிந்து அதைக் கடக்க வேண்டும். இவை அனைத்தும் நிகழ உணர்வுத் தெளிவு தேவை. உணர்வுத் தெளிவை அதிகப்படுத்துங்கள்.

அதற்கு சில டிப்ஸ்..

மனதின் சப்தம் கேட்கப்பட, உங்களோடு நீங்கள் செலவிடும்நேரம் அதிகப்படுத்தப்பட வேண்டும்... உணவு உட்கொள்ளுதல் போன்ற சில மணி நேரங்கள்தான் நீங்கள் உங்களுக்காகச் செலவு செய்யும் நேரம். அதுகூட உங்கள் உடலுக்காக மட்டுமே! உங்கள் மனதின் இயக்கம் புலப்பட, மனதை வெளிச்சமிட்டுப் பார்ப்பதற்கு உதவும் தியானத்திற்காகத் தினமும் ஒரு அரைமணி நேரமாவது கட்டாயம் செலவிட வேண்டும். உடலளவில் உங்களுக்காக நீங்கள் செலவிடும் நேரங்களில்கூட உங்களின் உடல் அங்கு இருக்கும்.

ஆனால் மன்மோ எதையாவது நினைத்துக் கொண்டு ஊர் சுற்றப் போயிருக்கும்.

மனதைப் புரிந்து கொண்டு அதைக் கடப்பதற்கு ஞானக்கருத்துக்கள் பெரிதும் உதவும். உங்களுக்காகச் செலவிடும் நேரங்களிலெல்லாம் முழுக்க முழுக்க உடல், மனம், உயிர் என்ற எல்லாக் கோணத்திலும் உங்களோடு இருங்கள். இவையனைத்தையும் கடைப்பிடிப்பவருக்கு உள்ளே ஒரு சுற்றுலா செல்வதற்கான விசா ரெடி!

கர்வத்தைவிட காரமானது ...

நான் அழகு நான் அசிங்கம் நான் உணர்ந்தவன் நான் தாழ்ந்தவன் நான் அதிர்ஷ்டக்காரி நான் துரதிஷ்டக்காரன்

என ஒருவன் தன்னை உயர்த்திக் கொள்வது அல்லது தன்னைத் தாழ்த்திக் கொள்வது இரண்டுமே அகங்காரத்தின் வெளிப்பாடுகள். என்ன! அதிர்ச்சியாக இருக்கிறதா ? உயர்வு மனப்பான்மையை (கா்வம்) அகங்காரம் எனச் சொன்னால் எல்லோரும் எளிதாக ஏற்றுக் கொள்வோம். தாழ்த்திக் கொள்வது (தாழ்வு மனப்பான்மை) அகங்காரம் எனச் சொன்னால் ஏற்றுக் கொள்வது கடினம்.

கர்வம், தாழ்வுமனப்பான்மையைவிட பல மடங்கு மேல்! என்ன ஆச்சரியமாக இருக்கிறதா ... கர்வத்தால் பேசிய வார்த்தைகளுக்கு இன்றோ நாளையோ சமூதாயத்திடம் கொட்டு வாங்கியே தீர வேண்டும். சமுதாயம் அடக்கிவிடும். தாழ்வு மனப்பான்மையால் ஒருவர் தன்னை தாழ்த்திக் கொண்டால் சமுதாயம் கொட்டாது. மாறாக சமுதாயம் மதிக்க ஆரம்பித்து விடும். இவற்றால் அகங்காரம் மிக, மிக ஆழமாக வளர ஆரம்பித்து விடும். அகங்காரத்தின் பாதிப்பு வெளியில் தெரியாது. ஆனால் சம்பந்தப்பட்டவரை மட்டும் பாதிக்கும். நிம்மதியைக் குலைத்துவிடும். நீங்கள் யோசித்தபடி அடக்கமாக, ஒடுக்கமாக இருந்தால் நிச்சயம் தவறில்லை.

ஆனால் ...

அடக்கிக் கொண்டும், ஒடுக்கிக் கொண்டும், இருந்தால் அது நிச்சயம் தவறு. நீர் தேங்கினால் விஷமாகும். சக்தி தேங்கினால் துர்சக்தியாகும். இது பெரும் பாதகத்தையே விளைவிக்கும். அகங்காரம் என்னும் புண், புரையோட ஆரம்பித்துவிடும். மனம் கெட்டு உள்ளுலக வாழ்க்கையில் தனிப்பட்ட உணர்வு சம்பந்தப்பட்ட வாழ்க்கையில் துர்மணம் வீச ஆரம்பிக்கும்.

தாழ்த்திக் கொள்கிறேன், பவ்யமாக நடந்து கொள்கிறேன் என்ற பெயரில் தம்மையும் அறியாமல் உணர்வுகளை தேவைக்கு மீறி கட்டுப்படுத்தும் போதுதான் சிக்கலாகி விடுகிறது.