80. ஊருக்கு உபதேசம் வேண்டாமே ...🔗

ராமகிருஷ்ணர் சொன்ன அழகான கதையொன்று...

அந்த அரசருக்கு பகவத் கீதையை தினம் போதிக்கும் பண்டிதர், கேட்கும் கேள்வி, "அரசே! நான் இன்று சொன்னதையெல்லாம் புரிந்து கொண்டீர்களா?" என்பதே.

இதற்கு எப்போதும் அரசர் சொல்லும் பதில் கேள்வி, "முதலில், நீங்கள் இதையெல்லாம் புரிந்துகொண்டீர்களா?'' என்பதே! எவ்வளவோ தயார் செய்தும், எவ்வளவு அழகாக விளக்கியும் அரசர் அதே கேள்வியையே எப்போதும் கேட்பதால் மனதுக்குள் சஞ்சலப்பட்டுக் கொண்டேயிருந்தார் பண்டிதர்.

அன்று காலை கீதை வகுப்பிற்கு பண்டிதருக்கு பதில் அரசரைப் பார்க்க ஒரு ஓலை வந்தது. அதில், ''அரசே! இன்று புரிந்து கொண்டேன். இனி வரமாட்டேன்'' என எழுதியிருந்தது.

பற்றற்று இருப்பது பற்றியும், புலன்களின் சிக்கலிலிருந்து விடுபடுவது பற்றியும் மணிக்கணக்காய் பேசியவருக்கு, தான் பேசும் வார்த்தைகள் தனக்கே இன்னும் அனுபவமாகவில்லை என்பது அன்றுதான் துல்லியமாய்ப் புரிந்தது. ஊருக்கு உபதேசம் செய்வதை நிறுத்தி, அன்றிலிருந்து தான் உருப்படுவதற்குச் செயல்பட ஆரம்பித்தார் அவர்.

பண்டிதர் 'தான் புரிந்துகொள்ளவில்லை' என்பதைப் புரிந்து கொள்வதற்கே அவ்வளவு காலமானது என்றால் .... நம் நிலை! உலகைப் பற்றி நான்கு வார்த்தை பேசத் தெரிந்ததால் உலகம் நமக்கெல்லாம் புரிந்ததாகுமா?