65. திறந்துபார் ..... தித்திக்கும்🔗

பரபரப்பூட்டும் புதியதொரு ஆராய்ச்சிக் கட்டுரை ஒன்றை முதுகலை மாணவன், பல்கலைக்கழகத்தில் வாசித்தான். அரங்கமே அதை ஆர்வமாகக் கேட்டது. உரை முடிந்ததும், கைதட்டலால் அரங்கமே அதிர்ந்தது.

ஆனால், முன்வரிசையில் இருந்த முனைவர் முகத்தில் மட்டும் ஈ ஆடவில்லை.

முனைவர் முகத்தைக் குழப்பமாய் பார்த்த மாணவன் அருகே சென்று, "கட்டுரையை நன்றாக உருவாக்கியிருக்கிறேனா?" என கேட்டதற்கு, "இது பொய் கட்டுரை. இந்தக் கட்டுரையில் இருக்கும் ஒவ்வொரு வார்த்தையும் ஏற்கனவே ஒரு நூலில் வெளிவந்துவிட்டது. என்னை ஏமாற்ற முடியாது" என்றார் முனைவர்.

மாணவன் அதிர்ச்சியில் ஆடிப்போனான். காரணம் அந்த கட்டுரை முழுக்க முழுக்க அவனே உருவாக்கியது. "நாளை அந்தப் புத்தகத்தோடு வருகிறேன்" என முனைவர் சொன்னதின் விளைவு, மாணவனின் அன்றிரவு தூக்கம் கலைந்து போனது.

அடுத்த நாள் காலை வந்த முனைவர், "இதைத் திறந்து பார்" எனச் சொல்லி அந்த நூலை தந்தார்.

திறந்த மாணவன் அதிர்ந்தான். அது ஆக்ஸ்போர்டு டிக்ஸ்னரி. ● மாணவனின் படைப்பாற்றலைக் கூட மட்டந்தட்டிப் பார்த்த முனைவர் போலவே .... எல்லோரையும், எல்லாவற்றையும் மட்டந்தட்டும் குறைகாணும் முட்டாள்தனம் கண்டுபிடிக்கப்பட வேண்டும். கரைக்கட்பட வேண்டும்.