42. துக்கத்தை துடைத்தெறியுங்கள்🔗

' ஞானமடைவது மிக எளிது' என ஞானிகள் சொன்னால் மனிதர்கள் புரிந்துகொள்ளத் தடுமாறுகிறார்கள். ஏன்?

Dr. நிட்டி இலவச கண்மருத்துவ முகாமில் குருடரிடம் "சிறியதாக ஆபரேஷன் செய்தால் ... உன்னுடைய பல வருட குருடு சரியாகிவிடும். இனி கைத்தடி இல்லாமல் நடக்கலாம்' எனச் சொன்னதும், குருடர்...

"ஆப்ரேஷ்னுக்கு அப்புறம் என்னால் பார்க்க முடியும், என நீங்கள் சொல்வது புரிகிறது. ஆனால் கைத்தடி இல்லாமல் நடக்க முடியும் எனச் சொல்வதுதான் புரியவேயில்லை" எனச் சொன்னாராம்.

அக்குருடருக்கு கைத்துடியானது உடலின் ஒரு அங்கமாகவே மாறிவிட்டது. இதேபோல் துக்கம் மற்றும் இயலாமை நிறைந்த மனமானது மனிதனின் ஒரு அங்கமாக இருப்பதாக நம்புவதே தடுமாற்றத்தின் மூலக்காரணம்.

43. எதிரியும் நண்பனாவான் .... நீங்கள் அன்பு செய்தால்

சனாதனர் நூனியிடம்,

குடும்பஸ்தர் ஒருவர் கேட்டார்,

"சாமி, நான் அன்பு செலுத்துவது சரியான விதத்தில்தான் செய்கிறேன், என் அன்பு தவறல்ல என்பதை எப்படி நான் கண்டுபிடிப்பது? உபாயம் சொல்லுங்கள்"

ஞானி, "உன் எதிரியை நேசிக்குமளவுக்கு பக்குவம் பெறும்போது உன் அன்பானது தவறல்ல எனும் பக்குவ நிலையை அடைகிறது.

எப்போது உன் எதிரிகளின் மகிழ்ச்சிக்காக ஒரு நண்பனைப் போல் செயல்பட ஆரம்பிக்கிறாயோ ... அன்று உன் அன்பானது சரியானதாகிறது".

எதிரியை நண்பனாக்கும் வல்லமை சரியான அன்பிற்கு உண்டு. நண்பனையே எதிரியாக்கும் வல்லமை தவறான அன்பிற்கு உண்டு.

> உண்மையான அன்பு 'சரி தவறுக்கு' அப்பாற்பட்டது.

அன்பு என்ற பெயரில் மனிதன் நிகழ்த்தும் பாச நாடகம் சரி தவறுக்கு உட்பட்டது.

44. அழப் பிறந்தாயா? ஆளப் பிறந்தாயா?

சீரியல் பார்த்த மனைவியிடம் முகுந்தன் கேட்டார். "சீரியலை விட விறுவிறுப்பானது வாழ்க்கை! வாழப்பிறந்தாயா? அழப்பிறந்தாயா? இப்படி மூழ்கிப்போக அதில் என்ன இருக்கிறது!". அடுத்தநாள் முகுந்தன் செய்தித்தாள் படிக்கையில், "செய்தித்தாளை விடக் கலவரமானது வாழ்க்கை! நான் மனைவியா? செய்தித்தாள் மனைவியா? அதில் மூழ்கிப்போக அப்படி என்னதான் இருக்கோ!" என்றார் மனைவி.

பிடித்தவரிடம் வரும் சச்சரவுகளுக்கு காரணமும் 'இது சரி', 'இது தவறு' எனும் நம் வரையறைகள்தான்.

45. எதற்காகப் போரிடுகிறீர்கள்

ரோகிணி நதி நீருக்காக சாக்கியர்களும், கோலியர்களும் போட்டியிட்டு போருக்கே தயாராகி விட்டனர்.

பரபரப்பின் நடுவே வெகு அமைதியோடு நுழைந்த புத்தர், "ரோகிணி நதி நீர் என்பதால் இந்த நீரை மதிக்கிறீர்களா? அல்லது இந்த நீர் தரும் நன்மைகளுக்காக இந்த நீரை மதிக்கிறீர்களா?" எனக் கேட்டதற்கு,

"வெறும் நீரை யார் மதிப்பார்கள்? அது செய்யம் நன்மைக்காகத்தான் மதிக்கப்படுகிறது. விரும்பப்படுகிறது என்றார்கள்.

"இருதரப்புக்கிடையே போர் உருவாகக் காரணமான இந்த நீர், இந்தச் சூழலில் நன்மை செய்கிறதா, தீமை செய்கிறதா ... இரத்தக் களறியாக்கும் போரைத் தூண்டும் நீருக்காகவா போரிடப் போகிறீர்கள்" எனக் கேட்டுவிட்டு புத்தர் கலைந்து சென்றார். போரும் கலைந்தது. ● நெருங்கியவரிடம் இருக்கும் சில தவறான செய்கைகளுக்காக நீங்கள் சண்டையிடுகிறீர்கள் என்றால் .... யாரை மதிக்கிறீர்கள்? நெருங்கிய வரையா? தவறுகளையா .... யோசியுங்கள். தப்பித்துக் கொள்ளலாம்.

46. அனுமதிய்த்துப் பாருங்கள்

ஒரு வாசகரின் கேள்வி "தினம் செய்யும் சிறிது நேரத் தியானம், கடினமான மனதை எப்படி வலுவிழக்கச் செய்யும்?" பதில் ... "தியானமும், மனமும் - இந்து மாமியார் மருமகள் போன்றவை. இரண்டுக்கும் ஒத்துப் போகாது. யாராவது ஜெயித்தாக வேண்டும். தியானம் உங்களுக்குப் புது வரவு! தினம் அனுமதியுங்கள்! உங்களையும் உங்கள் மனதையும் கைக்குள் கொண்டு வரும் வித்தை தெரியும். தியானத்தை அனுமதித்து பாருங்கள்".

இனிய வாழ்வு கனிய ... 'எளிய தியானத்தை' வலியப் போய், செய்தாலும் நல்லதே.

47. கூண்டுக்குள்ளே குறுகிவிடாதீர்கள்

அமேசான் காட்டிலிருந்து கொண்டுவரப்பட்ட அபூர்வ சிம்பன்ஸி குரங்கு ஒன்று கலிபோர்னியா பல்கலைக்கழகத்தாரால் தொடர்ந்து மூன்றரை வருடங்களாகத் தீவிர ஆராய்ச்சிக்குட்படுத்தப் பட்டது.

ஆராய்ச்சியில் இருபத்தைந்தடி கூண்டுக்குள் அதன் வாழ்க்கையும் நடவடிக்கையும் சுருக்கப்பட்டு விட்டது.

ஆராய்ச்சி முடிந்த பின் அதன் ஜோடி குரங்கும் வரவழைக்கப்பட்டது. இருபத்தைந்துடி, அறுபதடி கூண்டாக மாற்றப்பட்டது.

மாற்றப்பட்ட பின் தான் ஆராய்ச்சியாளர்கள் இன்னொரு ஆச்சரியத்தைக் கண்டுபிடித்தார்கள்.

கூண்டு அறுபதுடி பெருகினாலும், அந்தக் குரங்கு இத்தனை வருடமாகத் தான் வாழ்ந்து பழகிய அந்த இருபத்தைந்துடி இடத்தை மட்டுமே மீதமுள்ள வாழ்நாளெல்லாம் பயன்படுத்தியது.

குரங்கின் நடவடிக்கைகள் இருபத்தைந்தடிக்குள் சுருங்கிப் போனது.

இறுகிப் போனது.

மனித மனம், அது முதலில் கிரகிக்கும் கருத்துக்கள் மற்றும் சம்பவங்களைக் கொண்டு தன்னை உருவாக்கிக் கொள்கிறது. அவற்றிற்குள் உறைந்து இறுகிப் போகிறது. அது நல்லதானாலும், கெட்டதானாலும்! வாழ்க்கையில் ஒரே மாதிரியான சுகதுக்கங்களை மனிதன் தொடர்ந்து அனுபவிக்கக் காரணமானது இந்த மனித எலும்புகள்

48. குவித்தது போதும்

தத்துவப் பேராசிரியருக்கு கோபம்! "ஏற்கனவே ஷூ போட்டிருக்கிறேன். அதுமேலேயே ஷூ போடச் சொன்னால் எப்படி முடியும்?" என வெடித்தவரைப் பார்த்துச் சிரித்த ஜென்ஞானி, "இன்னொருவரின் எண்ணங்களை உங்கள் தலையினுள் நீங்கள் சுமந்து திரிவது சாத்தியமாகும்போது, இன்னொரு ஷூ போடுவதை வினோதமாகப் பார்ப்பது ஏன்?" எனக் கேட்டார்.

• சிறு உதவி செய்வதை விரும்பாதவர்கள் வண்டி வண்டியாய் குப்பையான எண்ணங்களை குவிக்கிறார்கள். வெட்கப்பட வேண்டியதுக்கு வெட்கப்படுவதேயில்லை.

49. தனக்காக உயிர்வாழ்பவன்

ஒரு காதலிக்கு வந்த சுவாரஸ்யமான ஈமெயில் ஒன்று ... என் அன்பே! உயிரே! முச்சே! வரும் வெள்ளி, உனைக் காண வருவேன். அப்போது, கடற்கரை மணலை நாராய்த் திரித்து - அதில் நட்சத்திரங்களையெல்லாம் கொய்து செய்த மாலையோடு, நீலவானத்தை உரித்து உனக்கு அதைச் சேலையாக மடித்து, உன் நெற்றிக்கு பொட்டிட்டு அழகு பார்க்க சூரியனையோ! சந்திரனையோ!

நிச்சயம் பறித்து வருவேன்