83. சுகமா? சுதந்திரமா?
முல்லா நஸ்ருதீன் தன் கால் அளவை விடச் சின்னதா யிருக்கும் ஷூவையே விரும்பி அணிவார். நாள் முழுவதும் அந்த இறுக்கமான ஷூ தரும் வலியோடுதான் எல்லா வேலையும் செய்வார். இரவு வீடு திரும்பும்வரை ஷீவைக் கழட்டவே மாட்டார்.
நஸ்ருதீனின் வினோதமான செயலால் ஆச்சரியமடைந்த எதிர்வீட்டுக்காரர், ஏன் அவர் இப்படிப்பட்ட ஒரு ஷூவை உபயோகிக்கிறார் எனக் கேட்டதற்கு,
"நாள் முழுக்க அந்த ஷூ தொல்லையைத் தரும். தொடர்ந்து இறுக்கமாயிருக்கும். ஷூ சிலநேரம் வலிக்குமளவுக்கு கூட அழுத்தும்" என நஸ்ருதீன் சொன்னார். "என்ன மடத்தனம்! இதற்காகவா அந்த ஷூவை அணிகிறீர்கள்?" என வருத்தத்தோடு எதிர்வீட்டுக்காரர் கேட்டதற்கு,
"ச்சேச்சே.. அதற்காக இல்லை. ஒரு நாள் முழுவதும் ஷூவோடு போராடிவிட்டு, இரவு வீடு வந்தவுடன் அந்த ஷூவை கழட்டும்போது ஒருவித சுகம் உண்டாகும் பாருங்கள்... அந்த சில நிமிட சுதந்திர சுகஉணர்வுக்காக ஒரு நாள் கஷ்டப்படுவது தவறே இல்லை!" என்றார் நஸ்ருதீன்.
● 'மனிதன் பிறந்தது ஏன்' என்பது புரியாததால், சில நிமிட சுகத்தைத் தரும் பேர், பணம், காசுக்காக வாழ்நாள் முழுவதும் உழைப்பதுதான் 'மனித வாழ்வு முறை' என்றாகி விட்டது. அதனால்தான் பேர், பணம், மது மற்றும் எல்லாம் மனிதனுக்கு திருப்தியைத் தருகிறது.
மனிதன் சில நிமிடங்கள் மட்டும் ஆனந்தமாயிருக்கப் பிறந்தவனல்ல. அதற்காக வாழ்க்கையை வீணடிப்பது புத்திசாலித் தனமல்ல.
84. ஏன் ஏமாற்றுகிறோம் ....
ஒரு கண்டிப்பான பேராசிரியருக்கு அன்று பிறந்தநாள் விழா. எல்லா மாணவர்களும் அவரிடம் வந்து வந்து பிறந்துநாள் வாழ்த்துக்கள் சொன்னபோது அவர் நன்றி என்று சொல்லாமல், "Same to you ... Same to you" என்றே சொன்னார். இது வினோதமாகப் பட்டதால் புதிதாய் வந்த பேராசிரியர் கேட்டார். "ஏன் நன்றி சொல்லாமல், இப்படிச் சொல்கிறீர்கள்"
அவர் சொன்னார், "நானும் மாணவனாய் இருந்து வந்தவன் தானே! எனக்கு வாழ்த்துக்கள் சொல்லும்போது. அவர்கள் மனதில் என்னைப் பற்றி என்ன சொல்வார்கள் என்பது கூடவா தெரியாது!" என்றாராம்.
ஏன் பிறந்தேன்? என்ற கேள்விக்கான பதில் அமைவமாகாத வரை, இது போல் ஒருவரையொருவர் ஏமாற்றி வாழும் போலி வாழ்வு தொடரும். தவிர்க்க முடியாதது.
85. வேண்டாம்பா இந்த வம்பு
சியாட்டெல் தியானக் கருத்தரங்கில், ஒரு அமெரிக்கத் தம்பதியினர் தங்கள் மகனை என்னிடம் அழைத்து வந்தார்கள்.
தம்பதியினர், 'இவன் எங்களின் சொல்பேச்சைக் கேட்பதே யில்லை. அதையும் தாண்டி உறவினர்கள் ஏதாவது அறிவுரை சொன்னால், அவர்களைப் பார்த்துக் கிண்டலாகச் சிரித்துவிட்டு, எங்களிடம் கண்சிமிட்டுகிறான்.
என்ன நினைக்கிறான், என்ன செய்கிறான் இவன் என்பது எங்களுக்குப் புரியவேயில்லை. இதற்கு என்ன தீர்வு" எனக் கேட்டார்கள்.
அந்தச் சிறுவனிடம் தனியாகக் கேட்டபோது, அவன் சொன்ன பதில் ஆச்சரியத்தைத் தந்தது. "ஏன் சொல் பேச்சு கேட்க வேண்டும்… என் தாயும், தந்தையும் நிம்மதியாக ஆனந்தமாக இல்லை. எப்போதாவது உபதேசம் செய்யும் உறவினர்களும் இவர்களைப் போலவே பாடுபடுபவர்கள்தான்.
ஆனந்தமாக வாழத் தெரியாத இவர்கள் சொல்லும் உபதேசங்களைக் கேட்டு நடந்தால், நானும் இவர்களைப் போலவே எதிர்காலத்தில் துக்கப்பட வேண்டியிருக்கும்தானே!
அப்பப்பா! எனக்கு வேண்டாம் இந்த வம்பு. இவர்களை விட நான் சந்தோஷமாகத்தான் இருக்கிறேன். அதை கெடுத்துக் கொள்ள வேண்டுமா?" என்றான்.
● நமக்கு தெரிந்த வாழ்வின் ஒரு சிறு பகுதிதான் மேலுள்ளது. அந்த தம்பதியரைப் போலவே, உங்களுக்குத் தெரிந்த வாழ்வின் 'தெரியாத பகுதிகள்' ஏராளம் இருக்கலாம். ஆராய்ச்சி நோக்கோடு கட்டுரையைத் தொடருங்கள்.