களமம் களமறிந்தவரும்🔗

க்ஷேத்ர க்ஷேத்ரஜ்ஞ விபாக யோகம் என்னும் இந்த அத்தியாயத்தில், கிருஷ்ணர் அர்ஜுனனிடம், க்ஷேத்ரம்-களம் மற்றும் க்ஷேத்ரஜ்ஞன்- அந்தக் களத்தை அறிந்தவர்- இந்த இரண்டைப் பற்றியும் பேசுகிறார்.

க்ஷேத்ரம் என்றால், உடல்; க்ஷேத்ரஜ்ஞ என்றால், தனக்கு ஒரு உடல் இருக்கிறது என்பதை அறிந்த விழிப்புணர்வு; விபாக என்றால், க்ஷேத்ரத்தையும் க்ஷேத்ரஜ்ஞனையும் வேறுபடுத்திப் பார்க்கும் ஜ்ஞானம்.

கிருஷ்ணர், நாம் வாழ்ந்து கொண்டிருக்கும் இந்த ஸ்தூல உடலைப் பற்றியும், அதனுள் இருக்கும் விழிப்புணர்வைப் பற்றியும் மிகத் தெளிவாகப் பேசுகிறார்.

நமக்குப் புரிந்தாலும் புரியாவிட்டாலும், நாம் உணர்ந்தாலும் உணராவிட்டாலும், நாம் எல்லோருமே ஏதேனும் ஒருவழியில், இந்த மொத்தப் பிரபஞ்சத்துடன் தொடர்புடையவர்களே. விழிப்புணர்வே அனைத்திற்கும் மூலகாரணம்; இது தொடக்கம் மட்டுமல்ல; இதுவே

மூலகாரணமும்கூட. இந்த மூலத்திலிருந்தே நாம் வந்திருக்கிறோம்; இதில்தான் இப்பொழுது நாம் வாழ்ந்து கொண்டிருக்கிறோம். இந்த மொத்தப் பிரபஞ்சம்தான், இந்தப் பிரபஞ்ச விழிப்புணர்வுதான், நாம் எல்லோரும் நிகழ்கிற, இருக்கிற இடமாக இருக்கிறது.

கிருஷ்ணர் அலைகளையும் சமுத்திரத்தையும் இங்கு உதாரணமாகப் பயன்படுத்துகிறார். நாம் அதை எப்படி அழைத்தாலும் - இந்து மதத்தினர் அதை, பிரபஞ்ச பேரறிவு அல்லது கடவுள் அல்லது ஆத்மா என்றும், புத்தமதத்தினர் நிர்வாணா என்றும், வேதாந்திகள் ப்ரஹ்மம் என்றும், முகமதியர் அல்லா என்றும் வேறு வேறு பெயர்களில் அழைத்தாலும் -அவை அந்தப் பிரபஞ்ச சக்தியை அல்லது பிரபஞ்ச பேரறிவைத்தான்

குறிக்கிறது.

இந்தப் பிரபஞ்ச பேரறிவை சமூத்திரத்திற்கு ஒப்பிடுகிறார் கிருஷ்ணர். இந்த முழுழுப் பிரபஞ்சமும் சமூத்திரம் போலவும், நாம் அனைவருமே அதில் அலைகளைப் போலவும் இருக்கிறோம் என்ற இரகசியத்தை வெளிப்படுத்துகிறார். நாம் இந்தச் சமூத்திரத்தின் அனுபவத்தைப் பெறுவது எப்படி என்பதை அவர் விளக்குகிறார்.

வாழ்க்கையில் நம் ஒரேயொரு பிரச்சினை என்னவென்றால்,

நாம் இந்தச் சமுத்திரத்தின் ஒரு பாகம் என்பதை எப்படியோ மறந்து விட்டோம் என்பதுதான்.

நாம் சமுத்திரத்தைச் சேர்ந்தவர்கள் என்பதை மறந்துவிட்டோம். நாம் க்ஷேத்ரஜ்ஞனைச் சேர்ந்தவர்கள் என்பதை மறந்துவிட்டோம். க்ஷேத்ரஜ்ஞ என்ற வார்த்தைக்கு விழிப்புணர்வு என்று பொருள். இதுவே, களம் செயல்படுவதற்குக் காரணமாக இருக்கிறது.

இந்த அத்தியாயத்தில், கிருஷ்ணர், க்ஷேத்ரம் மற்றும் க்ஷேத்ரஜ்ஞன் பற்றிய இரகசியங்களை வெளிப்படுத்துகிறார். க்ஷேத்ரஜ்ஞனின் இரகசியங்களை நாம் அறியாதிருந்தால், க்ஷேத்ரம், தானே முதலாளி என்பதுபோல் செயல்பட ஆரம்பித்துவிடும்.